Rais wa Afrika Kusini akosoa polisi nchini humo

Jacob Zuma

Rais Jacob Zuma wa Afrika Kusini amekosoa vikali polisi kwa kufyatua risasi kiholela wakati wa kukabiliana waandamanaji nchini humo. Katika mahojiano yaliyochapishwa jana  Jumamosi, Zuma alielezea kusikitishwa kwake na namna polisi wanavyokabiliana na waandamanaji jambo ambalo limepelekea watu karibu tisa kuuawa mwaka huu. Matamshi ya Zuma yamekuja siku moja baada ya kuuawa mchimba migodi wa shirika la Anglo-American Platinum wakati polisi walipowashambulia wachimba migodi waliokuwa wamegoma mjini Northam.  Rais Zuma amesema polisi wanahitaji mafunzo maalumu ya kukabiliana na waandamanaji. Rais wa Afrika Kusini pia ameelezea wasiwasi wake kuhusu migomo inayoandamana na machafuko na kuongeza kuwa baadhi ya waandamanaji hubeba silaha wakati wa maandamano. Wachimba migodi Afrika Kusini huandamana mara kwa mara kudai nyongeza ya mishahara na mazingira bora ya kazi.
Inaelezwa kuwa, aghlabu ya mashirika katika sekta ya madini nchini Afrika Kusini yanamilikiwa na wawekezaji kutoka Ulaya na Marekani ambao licha ya kupata faida kubwa sana katika uwanja huo lakini yamekuwa yakiwalipa mishahara duni wafanyakazi wao.....IDHAA YA TEHRAN