MANYARA WALIA NA ELIMU

Na Julieth Peter, Manyara

 

Wazazi na Walezi nchini wametakiwa kuwapatia watoto wao Elimu  kwani huo ndio urithi pekee ambao utawaangazia kama taa katika maisha yao ya baadae na kuweza kuwajengea uwezo wa kujitegemea  na kupambana na dunia ya utandawazi. Kauli hiyo imetolewa na Mkurugenzi wa  Rift Valley School  Bw, Henry Mallya  kwenye mahafali ya tano ya darasa la saba yaliyofanyika katika shule hiyo mjini Babati Mkoani Manyara.

Bw. Mallya alisema kuwa  elimu ndio urithi pekee  kwa watoto na kizazi kilichopo hivyo ni jukumu la wazazi na walezi  kuhakikisaha wanawapatia watoto wao elimu iliyo bora  na si bora elimu. Aidha alisema kwamba wazazi wanatakiwa kuwa wawajibikaji  kwa kutoa ushirikiano wa kutosha kwa watoto wao na walimu  ikiwa ni pamoja na  kutimiza wajibu wao wa kulipia ada kwa muda muafaka bila kusumbuana ili shule  hiyo iweze kutiza malengo yake ya maendeleo ya kutoa elimu iliyo bora .

Mkurugenzi huyo aliendelea kuwashauri wazazi  kuwa    wandelee  kuwaandaa vizuri watoto  wao  ili wawe tayari kwa masomo ya sekondari  au ufundi ambapo aliwaasa  vijana nao  kuwa makini pindi wanapo kuwa wakisubri  kuendelea na masomo yao . “Mnapokuwa huko mnasubiri kuendelea na masomo yenu epukeni tabia mbaya za kuiga kutoka kwenye makundi rika  na mzingatie maadili mema mliopewa  na walimu pamoja na walezi wenu” Alisema Mallya.

Kwa upande wake mkuu wa  shule hiyo  Mwl. Mtimilifu Ndekidemi  Alisema kuwa shule yao inajitahidi kuimarisha  mahusiano mazuri baina yake na jamii inayowazunguka  pamoja na sekta nyinginezo  ili kuweza kusaidia jamii na kuboresha maendeleo ya o na Taifa kwa ujumla .Alisema kuwa kama jukumu la shule ni kutoa elimu iliyo bora na kumwendeleza mwanafunzi kimwili na kiroho na kiakili  hivyo basi wanahitaji ushirikiano  mkubwa kutoka kwa jamii hasa wazazi na walezi  ilin waweze kufikia malengo hayo.

Mkuu huyo aliwataka wazazi kufuatilia maendeleo ya  watoto kila wakati na kuhakikisha kuwa watoto wao wanahudhuria shuleni muda wote wa masomo kwa kuwalipia ada mapema na kuepuka usumbufu wa kurudishwa nyumbani mara kwa mara,  wafuatilie matokeo ya mitihani yao, wakae na watoto kwa ushauri zaidi wa mara kwa mara kuhusu matumizi mazuri ya muda pamoja na makundi rika na na kuwaepusha  na madhara yatokanayo na utandawazi.

Kwa upande wake mkurugenzi wa mji wa Babati ambaye ndiye alikuwa mgeni rasmi kwenye mahafali hayo Bw. Omary Mkombole aliwapongeza wanafunzi hao kwa kupata matokeo mazuri ambapo wameweza kufaulu wote hakuna aliyefeli hata mmoja na aliwataka waongeze juhudi zaidi wanapoendelea na Elimu ya sekondari. Pia Bw. Mkombole aliwaasa wahitimu hao kujiendeleza kimasomo na wajihadhari na chips kuku pamoja na mafataki.

Nao wahitimu wa darasa la saba waliushukuru uongozi wa shule, waalimu, wazazi na walezi kwa kila mmoja kutimiza wajibu wake  na kuwawezesha kushika nafasi nzuri kiwilaya, kimkoa na kitaifa.

Pia walisema kuwa pamoja na mafanikio waliyoyapata kumekuwa na changamoto kama vile upungufu wa vifaa vya  kujifunzia, ukosefu wa maktaba na maabara ya somo la sayansi. Hivyo wameuomba uongozi wa shule utoe kipaumbele katika kukabiliana na na changamoto kwa kununua vifaa vya kutosha na kujenga haraka majengo ya maktaba, maabara na jengo la computer kwa kufundishia somo la ICT (TEHAMA).