Kaseba: Filamu ya Bongo Mafia itatisha

BINGWA wa dunia wa ngumi za mateke ‘Kick Boxing’, Japhet Kaseba, ametamba kuwa filamu yake ya ‘Bongo Mafia’ itafanya vizuri sokoni kwa sababu amewashirikisha wasanii mahiri mbalimbali nchini.

Akizungumza jijini Dar es Salaam jana, Kaseba alisema filamu hiyo ni ya aina yake, imeingia sokoni ikiwa ni moto wa kuotea mbali na kuwasihi wapenzi na mashabiki wa filamu kutoikosa kwani watajifunza mengi yaliyomo ndani yake kutokana na kubeba uhalisia.
“Bongo Mafia ni filamu ya ‘Actions’, kiongozi ni mimi mwenyewe, katika matukio hayo,” alisema Kaseba.

Kaseba alisema filamu hiyo aliyowashirikisha wasanii mahiri kama Husna Posh ‘Dotnata’ Kelvin, Mohamed Mkumbila ‘Muhogo Mchungu’, Pendo Njau, Rogers Master na wengineo, ni yenye mvuto mkubwa ambayo mtu akifanikiwa kuipata ataikubali.
Aidha, Kaseba ametoa wito kwa wadau wa filamu hapa nchini kujionea matukio yaliyoko kwenye filamu hiyo ambayo yanasadifu uhalisia wa maisha ya Watanzania.